الەمدەگى كولىك كەپتەلىسى كوپ بولاتىن قالالار انىقتالدى

GPS TomTom كومپانياسى الەم بويىنشا كەشكى ۋاقىتتاردا ەڭ ۇزاق كەپتەلىس بولاتىن قالالاردىڭ رەيتينگىن جاريالادى, دەپ جازادى CNN. وعان 48 مەملەكەت بويىنشا 390 قالا قاتىسقان.  اتالعان رەيتينگتى جاساۋ ءۇشىن GPS TomTom ءوندىرۋشىسى وسى قالالاردىڭ بارلىعىنداعى جول ترافيگىن باقىلاۋعا العان. 2017 جىل رەيتينگى بويىنشا كەشكى ۋاقىتتا ەڭ كوپ كەپتەلىس بولاتىن قالالار ءتىزىمى:

1. بانگكوك, تايلاند;
2. مەحيكو, مەكسيكا;
3. بۋحارەست, رۋمىنيا;
4. دجاكارتا, يندونەزيا;
5. ماسكەۋ, رەسەي;
6. چۋنتسين, قىتاي;
7. ىستامبۇل, تۇركيا;
8. سانكت-پەتەربۋرگ, رەسەي;
9. چجۋحاي, قىتاي;
10. سانتياگو, چيلي;
11. گۋانچجوۋ, قىتاي;
12. شيتسزياچجۋان, قىتاي;
13. شەنچجەن, قىتاي;
14. لوس-اندجەلەس, اقش;
15. بەيجىڭ, قىتاي.

TomTom ترافيگىنىڭ باس ساراپشىسى نيك كوننىڭ ايتۋىنشا, جول كەپتەلىسىنە اسەر ەتكەن فاكتورلاردىڭ ءبىرى - قالالاردىڭ ەكونوميكالىق ءوسىمى. سەبەبى بۇل جاعدايدا حالىق كوبىنەسە قالا ماڭىنداعى اۋىلدار مەن ەلدى مەكەندەرگە كوشىپ, كولىكپەن قاتىنايتىن بولعان. مەحيكو سەكىلدى كەيبىر قالالاردا مەترو حالىق كوپ قونىستانعان جەرلەرگە بارمايتىنى دا جول كەپتەلىسىنە سەبەپ بولىپتى. اتالعان رەيتينگتە بانگكوك قالاسى ەكى جىل قاتارىنان كوش باستاپ تۇر. ال ىستانبۇل قالاسى تىزىمدە جىلدان جىلعا تومەنگە سىرعىپ كەلەدى. ونىڭ سەبەبىن كومپانيانىڭ باس ساراپشىسى قالا بيلىگىنىڭ  جولداعى جاعداي تۋرالى جۇرگىزۋشىلەرگە  اقپارات بەرۋ مۇمكىندىكتەرىن قولعا العانىمەن ءتۇسىندىرىپتى.